أحبك
لا تظن أنساك
وصعبه أيامي التعدي
أحبك وألك روحي تريد
ما تبرد ولا تهدي
ولو خليتني الوحدي
ولو كلبي يناغي أعليك كل لحظه التمر يحدي
ولو فركاك ليه تمرد بجبدي
ولو جرحك نزف شريان من باب الكلب يدي
ولو دمعات هجرك زرفن خدي
لو أدري الدموع تجيب وتودي
جنت افتح بيابي العين ألك نهران
ميهه يكايش البردي
حبك معدن التيزاب لا يعتك ولا يصدي
ياهو ألي خذك مني
وراح هواك من عندي
وياهو الي يشم عطرك
وياخذ زهرك الوردي
ياهو ألي يحن أعليك
عدا كلبي الألك يفدي
حزني أعليك ما يخلص
حزن عاشور كل ليل اليمر يبدي
وصبري أعليك اكبر من صبر أيوب
بس كون الصبر يجدي
يالماخذ دليلي وياك وين تروح
وألمن هل كلب تهدي
ماظل صبر من جفاك
أذاّني ولك فركاك
وبعدك حيل دمرني
وهجرك هالكلب عذب
ولك حكي من اصبر الروح
أصبرهه وترد ردود غصباً عالصبر تتعب
ولك حكي من اصبر العين
والوجنات بالدمعات تترطب
لتصدك اليكلك آنه يوم أنساك
هذا الكالكم جذبّ
حزنه ألكم حزن منكوب
كطعنه الزاد لا ناكل ولا نشرب
حزنه ألكم حزن أيتام
غربه صفوا لا امهم بقت لا أب
صبرنه الشوككم طوّل صبر فوك الصبر يركب
حالي من بعد فركاك كل يوم اليمر يصعب
ما ظن يوم ننسه ولا جرحنه يطيب
بس نار الكلب تلهب
آنه ألي أنوح أعليك حد الموت
ومنو غيرك يحقله دموعنه تنصب
ومنو غيرك أحبه وروحي أخذهه وياه
ومنو غيرك يريده الكلب دومه يذكره وينحب
سوده الدنيه من فركاك يوم تروح
وحتّ هذا الفلك يخرب
الجنه
هاي الجنه
أذا مو أنت بيهه ظلمه تصير
لا تنراد لا تنحب
وأذا انت بجهنم أدري بيك هناك
أريد آنه أجيك ويمك أتكرب
أتمنى أصير بقعر وادي ويل
وأصّلي ليلي كله وأطلب من الرب
أن أبقه ولك وياك حتّ بالنار
واتحمل عذاب ولا أمل وأتعب
وأظمك حيل حتى لا تمرك نار
وسعير النار أخليه بالكلب ينصب
عليكم بجهّ حتى الطير
بطلّ لحن ظل حزنان طير الحب
عليكم بجتّ حتى الكاع
حتى النخل ما رطبّ
دمعنه ألكم مطر تشرين
شما بطلّ رجع ينصب
تمنيتك تظل وياي بنص كلبي
وأخاف أعليك
لكن ما ألك جيه
بس ظل الأجل يكرب
بس ظل الأجل يكرب